Ministri izraelit i Financave, Bezalel Smotrich, ka njoftuar se do të nisë ndërtimin e 3401 njësive të reja banimi në zonën e ashtuquajtur E1, një rajon midis Jerusalemit Lindor dhe vendbanimit të paligjshëm Ma’ale Adumim, pas një ndërprerjeje prej dy dekadash.
Ky vendim vjen pavarësisht presionit të madh ndërkombëtar për të ndaluar ndërtimet në këtë zonë strategjikisht të ndjeshme, e cila ndodhet përtej vijës së gjelbër.
Kritikët paralajmërojnë se lidhja e Ma’ale Adumim me Jerusalemin do të ndante territorin palestinez në dy pjesë, duke penguar lëvizjen e lirë midis Ramallahut dhe Betlehemit, e cila gjë do të rrezikonte seriozisht mundësinë për një zgjidhje politike në të ardhmen.
Smotrich ka deklaruar hapur se ky projekt ka për qëllim “anulimin e idesë së një shteti palestinez”, raporton jp.
“Planet për ndërtim në E1 hedhin poshtë idenë e një shteti palestinez dhe janë pjesë e hapave që po ndërmarrim në terren në kuadër të planit për sovranitet de facto, të cilin e nisëm me formimin e kësaj qeverie,” tha ai, duke shtuar se ka ardhur koha për të “ndalur dekada presionesh ndërkombëtare dhe ngrirjesh” dhe për të lidhur Ma’ale Adumim me Jerusalemin.
Në deklaratat e tij, ai shkoi edhe më tej duke pretenduar se Bregu Perëndimor i takon Izraelit “sipas një premtimi hyjnor”.
“Ata do të flasin për ëndrrën palestineze, ndërsa ne do të vazhdojmë të ndërtojmë realitetin hebre. Ky realitet i jep fund përfundimisht idesë së një shteti palestinez, sepse nuk ka asgjë për të njohur dhe askënd për të njohur. Bregu Perëndimor është pjesë e Izraelit sipas premtimit hyjnor,” deklaroi Smotrich, duke theksuar se ka mbështetjen e plotë të kryeministrit, Benjamin Netanyahu, transmeton Gazeta Express.
Vendimi për ndërtim në zonën E1, që prej kohësh konsiderohet si “vijë e kuqe” nga bashkësia ndërkombëtare, mund të shtojë më tej tensionet në terren dhe të shkaktojë valë të reja kritikash ndaj politikës së vendbanimeve të Izraelit.
