Drejtori rajonal i policisë në Gjilan, Agron Rukiqi, në konferencë për media ka bërë të ditur se për vrasjen e trefishtë që ndodhi sot në këtë qytet, në vend të ngjarjes është arrestuar një person.
Rukiqi tha se tre persona janë shpallur në kërkim si të dyshuar për vrasje të rëndë, Mefail Shkodra, bashkë me dy djemtë e tij, Edonis dhe Engjull Shkodra.
“Personi i katërt është arrestuar në vend të ngjarjes pasi janë duke u hetuar të gjitha veprimet nëse i njëjti mund të ketë ndërlidhje me këtë rast”.
“Tre persona janë shpallur në kërkim policor, dhe është bërë kërkesa për bashkëpunim ndërkombëtar dhe janë njoftuar pikat kufitare”, tha ai, njofton Klankosova.tv.
Ndërsa, prokurori e rastit, Isuf Sadiku, tha se bashkë me policinë kanë ndërmarrë veprimet fillestare ku janë bërë edhe disa urdhër-kontrolle e të cilat kanë rezultuar se personat e dyshuar nuk gjenden aty.
“Më të pranuar informatën, prokurori ka dalë në vendin e ngjarjes. Bashkë me policinë kemi ndërmarrë veprimet filllestare. Kemi bërë publikimin nëpër media dhe faqen e policisë”.
“Kemi bërë edhe disa urdhër-kontrolle por kanë rezultuar që personat e dyshuar nuk gjenden aty. Për motivet është ende herët që të dalim me qëndrim. Ditët në vijim do të merren në vijim familjarët e viktimave”, tha Sadiku.
