LDK-ja ka reaguar të martën mbrëma, duke shprehur besimin se Gjykata Kushtetuese e Kosovës do të marrë një vendim të drejtë dhe në përputhje me mandatin e saj kushtetues, për të zgjidhur situatën e krijuar në Kuvendin e Kosovës dhe për të shmangur bllokadën institucionale.
Në një komunikatë për media, LDK-ja thekson se lënda e paraqitur para Gjykatës Kushtetuese përmban, siç thuhet, një fakt të pakontestueshëm: “Partia fituese e zgjedhjeve nuk e ka përmbushur detyrimin kushtetues për të propozuar kandidatin për kryetar të Kuvendit në seancën konstituive.”
Sipas LDK-së, në vend të kësaj është insistuar 48 herë për votime jashtë rendit të ditës dhe procedurës kushtetuese, duke shkaktuar një bllokadë të qëllimshme dhe duke treguar mungesë të vullnetit dhe kapacitetit për të ushtruar përgjegjësinë që i takon si subjekt i parë.
Komunikata e plotë:
LDK-ja pret vendim të drejtë nga Gjykata Kushtetuese për të shmangur bllokadën institucionale
Lidhja Demokratike e Kosovës (LDK) shpreh besimin e saj të plotë se Gjykata Kushtetuese do të veprojë në përputhje me mandatin e saj kushtetues dhe të japë një vendim të drejtë lidhur me situatën aktuale të bllokadës institucionale.
Lënda e dorëzuar nga LDK-ja para Gjykatës Kushtetuese ka në thelb një fakt të pakontestueshëm: subjekti politik që ka dalë i pari në zgjedhje nuk e ka zbatuar agjendën e seancës konstituive, duke refuzuar të propozojë kandidat për Kryetar të Kuvendit. Përkundrazi, përmes insistimit të përsëritur – plot 48 herë – është kërkuar votim jashtë rendit të ditës dhe jashtë procedurës kushtetuese, në vend se të propozohej kandidati për Kryetar Kuvendi siç kërkon Kushtetuta dhe praktika parlamentare.
Kjo sjellje ka prodhuar bllokadë të qëllimshme dhe ka dëshmuar se subjekti në fjalë nuk ka pasur as vullnetin dhe as kapacitetin për të ushtruar të drejtën dhe përgjegjësinë që i takon të parit.
LDK-ja e ka bërë të qartë se, në përputhje me vendimet e mëhershme të Gjykatës Kushtetuese dhe me parimet themelore të funksionimit të sistemit kushtetues parlamentar, në rast se subjekti i parë dështon të sigurojë shumicë, e drejta për të propozuar kandidatin duhet t’i takojë shumicës parlamentare. Sistemi demokratik funksionon mbi bazën e shumicës dhe përgjegjësisë, jo të bllokadës dhe mungesës së vullnetit politik.
Gjykata Kushtetuese ka një rol kyç në garantimin e funksionimit të institucioneve dhe në mbrojtjen e rendit demokratik në përputhje të plotë me Kushtetutën e Kosovës.
LDK-ja pret nga Gjykata Kushtetuese një vendim të drejtë dhe në përputhje me frymën e Kushtetutës – që i hap rrugë shumicës parlamentare të ushtrojë të drejtën për të propozuar kandidatin për Kryetar të Kuvendit dhe të rikthejë normalitetin institucional.
LDK-ja mbetet e përkushtuar për ruajtjen e rendit kushtetues dhe për një qeverisje që reflekton vullnetin e qytetarëve të Kosovës.
