Barcelona i ka mbyllur përfundimisht dyert mundësisë për të nënshkruar me mbrojtësin e djathtë të Interit, Denzel Dumfries.
Holandezi, i cili ishte përmendur si një opsion për të përforcuar krahun e djathtë të mbrojtjes, nuk është më në planet e klubit katalanas.
Një datë kyçe në këtë çështje ishte 1 gushti, kur skadoi klauzola e lirimit prej 25 milionë euro që mundësonte largimin e tij pa negociata.
Tashmë, çdo klub i interesuar duhet të negociojë drejtpërdrejt me Interin, që kërkon një tarifë dukshëm më të lartë – një skenar që Barcelona nuk është e gatshme ta ndjekë.
Klubi katalanas beson se ka mbulim të mjaftueshëm në pozicionin e mbrojtësit të djathtë dhe nuk ka në plan të realizojë më asnjë afrim në këtë repart.
Dumfries, 29 vjeç, kishte shprehur gatishmërinë për një hap të ri në karrierë dhe ia kishte besuar procesin agjentit të tij, Jorge Mendes, me qëllim që të lehtësonte kalimin te Barça.
Por, sipas Mundo Deportivo, asnjë klub nuk pranoi të paguante klauzolën para se ajo të skadonte.
Mbrojtësi është aktualisht i lidhur me Interin deri në vitin 2028, gjë që i jep klubit italian komoditet në çdo negociatë dhe asnjë nxitim për shitjen e tij.
Në këto rrethana, përveç nëse ndodh ndonjë përmbysje e papritur, Dumfries do të vazhdojë të mbrojë ngjyrat e Interit për sezonin e ri, transmeton Telegrafi.com
Ndërkohë, në “Camp Nou” është mbyllur kapitulli për një transferim të tij – ëndrra për ta parë në fanellën blaugrana ka marrë fund.
