Qytetarët prizrenas, mysafirë të rastit ose qëllimor si dhe adhuruesit e librit, nga 30 korriku deri më 3 gusht, mund të kënaqen NË BOTËN E LIBRIT, që ju ofron Panairi tradicional i XVII-të i librit, “Prizreni 2025”, që mbahet në Sheshin e Lidhjes në Prizren, në organizim të OJQ IKS (Insituti për Kulturë dhe Kërkime Shkencore) në Prizren, shkruan InLajmi.
Për pesë ditë në kryeqytetin shpirtëror e kulturor të gjithë shqiptarisë, 25 Shtëpie të njohura Botuese, nga Kosova, Shqipëria dhe Maqedonia e Veriut, do prezantohen me libra dhe titujt më të ri, në gjuhën shqipe, angleze, turke dhe boshnjake.
Në muzgjet e bukura të Prizrenit, gjatë kohës së Panairit, në Sheshin e Lidhjes, për pesë mbrëmje, Ditar Kabashi dhe Osman Goranci, do të bashkëbisedojnë me studiues të historisë dhe me emra të njohur të letrave shqipe. /InLajmi/
