Gjykata Speciale nga data 28 korrik 2025 do të jetë në pushim veror. Kjo Gjykatë, vazhdon punën më 15 gusht 2025.
Gjatë kësaj periudhe kohore të pushimit, nuk do të mbahen seanca dhe disa shërbime jothelbësore pritet të jenë në minimum, raporton “Betimi për Drejtësi“.
Në anën tjetër, Gjykata njofton se do të vazhdojë punën në të gjitha seksionet e saj dhe mund të bëhen parashtrime përveçse nëse gjykatësit kanë urdhëruar ndryshe.
Veç kësaj, edhe afatet gjyqësore të vendosura, është thënë që vazhdojnë të jenë në fuqi.
Ndryshe, kjo Gjykatë ka në punë disa raste penale, duke përfshirë atë të ish-krerëve të Ushtrisë Çlirimtare të Kosovës (Hashim Thaçit, Kadri Veselit, Rexhep Selimit dhe Jakup Krasniqit), rastin e Pjetër Shalës, rastin tjetër të Thaçit i cili akuzohet për vepra penale kundër administrimit të drejtësisë së bashku me Bashkim Smakajn, Fadil Fazliun, Isni Kilajn dhe Hajredin Kuçin.
Kujtojmë se Kushtetuesja e Speciales ka vendosur që nuk ka shkelje të të drejtave të njeriut në vendimin e Supremes ndaj Salih Mustafës e cila la në fuqi dënimin prej 15 vjetësh burgim për krime lufte. Ndërsa, në vuajtje të dënimit është edhe Haxhi Shala i cili së bashku me Sabit Januzin dhe Ismet Bahtijarin pranuan fajësinë për veprat penale kundër administrimit të drejtësisë. Dy të fundit janë liruar me kusht. Vendimi ishte marrë më 19 shkurt 2025 ndërsa lirimi u mundësua më 21 shkurt 2025.
Më 18 maj 2022, nga Dhomat e Specializuara të Kosovës në Hagë u shpallën fajtorë Nasim Haradinaj dhe Hysni Gucati, lidhur me veprat penale të pengimit të personave zyrtarë dhe pengim të administrimit të drejtësisë, duke i dënuar me nga katër vite e gjysmë burgim, ku iu llogaritej koha e kaluar në paraburgim, si dhe me nga 100 euro gjobë.
Pas ankesës në Apel, Kolegji i Gjykatës së Apelit nxori aktgjykim lidhur me ankesën e dy të dënuarve nga shkalla e parë, ku u konfirmuan shumica e veprave për të cilat ishin dënuar. Por, dënimi u zbrit në 4 vite e tre muaj dhe iu konfirmua dënimi me 100 euro gjobë. Megjithatë, kërkesat për mbrojte të ligjshmërisë në këtë rast u refuzuan nga Supremja dhe Kushtetuesja e Speciales.
Hysni Gucati së bashku me Nasim Haradinajn, akuzoheshin për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës.
Gjatë vitit 2023, është marrë vendim për modifikim të dënimit ndaj Nasim Haradinajt dhe Hysni Gucatit. Lirimi i Gucatit u bë më 18 tetor, ndërsa i Haradinajt më 14 dhjetor 2023.
