Ylli i ri i Netflix, Owen Cooper, ka hyrë në historinë e televizionit si nominimi më i ri ndonjëherë për aktor dytësor në një serial të kufizuar apo film televiziv, në çmimet prestigjioze Primetime Emmy Awards.
Vetëm 15 vjeç, Cooper ka thyer një rekord që qëndronte prej më shumë se gjysmë shekulli, duke kaluar aktorin Scott Jacoby, i cili ishte 16 vjeç kur u nominua në vitin 1972 për filmin televiziv “That Certain Summer”.
Cooper nuk kishte asnjë përvojë aktrimi para se të provonte audicionin për “Adolescence”, drama e Netflix-it që u xhirua në një plan të vetëm nga regjisori britanik Philip Barantini. Në serialin që u bë menjëherë hit ndërkombëtar, ai interpreton Jamie Miller, një 13-vjeçar që arrestohet nga policia e armatosur nën dyshimin për vrasje.
erformanca e tij e jashtëzakonshme ka marrë lëvdata nga kritika dhe kolegët – madje aktori i njohur Stephen Graham e krahasoi Cooperin me legjendën Robert De Niro, duke e cilësuar si një talent të rrallë dhe të natyrshëm.
“Adolescence” nuk është vetëm një sukses personal për Cooper, por një nga serialet më të ndjekura dhe të vlerësuara të vitit, që theu rekorde shikueshmërie në javën e parë të publikimit dhe u shpall nga kritikët si “një tronditje emocionale” dhe “shfaqje mjeshtërore e aktrimit të papërvojë”.
Cooper do të përballet në të njëjtën kategori me emra të mëdhenj të kinemasë dhe televizionit, përfshirë bashkëaktorin Ashley Walters, Javier Bardem (“Monsters: The Lyle And Erik Menendez Story”), Bill Camp dhe Peter Sarsgaard (“Presumed Innocent”), si dhe Rob Delaney (“Dying For Sex”), transmeton Top Channel.
Votimi final nga anëtarët e Akademisë do të zhvillohet nga 18 deri më 27 gusht, dhe fituesit do të shpallen fillimisht në ceremonitë Creative Arts Emmy më 6 dhe 7 shtator, ndërsa Primetime Emmy Awards, edicioni i 77-të, do të mbahet më 14 shtator, duke u transmetuar drejtpërdrejt në CBS dhe në platformën Paramount+.
