Modelja spanjolle Claudia Calvo, e njohur si “Miss Teenager Spain 2021” dhe “Miss Teenager Europe 2022”, ka pretenduar se është ftuar në festën e ditëlindjes së 18-të të futbollistit të Barcelonës, Lamine Yamal, por ka refuzuar të marrë pjesë për shkak të disa kërkesave të çuditshme nga organizatorët.
Sipas saj, ajo u kontaktua jo vetëm për të marrë pjesë në festë, por edhe për të rekrutuar 12 vajza të tjera që duhej të përmbushnin kritere të veçanta fizike, si madhësia e gjoksit apo ngjyra e flokëve, duke preferuar biondet.
Ajo gjithashtu pohoi se organizatorët ofruan 15 mijë euro për secilën vajzë për një qëndrim 24-orësh, përfshirë edhe një kartë krediti për shpenzime gjatë festës.
Ndër të tjera, përmendi rregulla të rrepta si ndalimi i përdorimit të telefonave, ndalimi i drogës dhe sekreti për vendndodhjen e festës, e cila mendohet se është mbajtur në një jaht luksoz në Mesdhe.
Ndërkohë, vetë Yamal u pa duke festuar në shoqërinë e familjes dhe miqve të tij, përfshirë bashkëlojtarët e Barcelonës, Gavi dhe Alejandro Balde si dhe figura të njohura të muzikës si Bizarrap, Duki, Ozuna dhe Bad Gyal, transmeton Telegrafi.com
Festa është komentuar gjerësisht në rrjet për shkak të gjërave luksoze dhe akuzave mbi mënyrën e organizimit të saj.
