Kryetari i Partisë Demokratike të Kosovës, Memli Krasniqi priti sot në takim të Dërguarën e Posaçme të Mbretërisë së Bashkuar për Ballkanin Perëndimor, Dame Karen Pierce, me të cilën diskutuan për dialogun Kosovë – Serbi.
Krasniqi tha se me Karen Pierce biseduan edhe për zhvillimet aktuale në Kosovë e rajon, si dhe me fokus të veçantë për në krizën institucionale në vend.
Përmes një postimi në rrjetin social, Facebook, Krasniqi tha se ambasadoren e njoftoi me qëndrimet dhe përkushtimin e Partisë Demokratike të Kosovës për t’i dhënë zgjidhje kësaj situate, përmes respektimit të Kushtetutës, percjell Klankosova.tv
“Falënderova ambasadoren Pierce për mbështetjen e vazhdueshme të Mbretërisë së Bashkuar ndaj Kosovës në të gjitha etapat shtetformuese, nga liria dhe pavarësia, e deri tek aspiratat tona euroatlantike. Diskutuam gjithashtu për procesin e dialogut Kosovë – Serbi dhe nevojën për një marrëveshje përfundimtare me njohjen reciproke në qendër, si kusht për paqe të qëndrueshme dhe integrim të plotë të rajonit”, shkroi ndër tjerash Krasniqi.
