Një incident i rëndë ka ndodhur mbrëmjen e së mërkurës në lagjen e Spitalit në Prishtinë, konkretisht në rrugën “Malush Kosova”.
Sipas Policisë së Kosovës, rreth orës 20:30, një person ka rënë nga lartësia e një ndërtese gjatë përpjekjes për t’i shpëtuar arrestimit.
I dyshuari kishte urdhër-arrest vendor dhe ndërkombëtar për veprën penale të vrasjes së rëndë.
“Bazuar në informacionet e para nga vendi i ngjarjes, i dyshuari, në përpjekje për t’iu shmangur arrestimit policor, ka rënë nga një lartësi dhe për pasojë ka pësuar lëndime trupore. Të njëjtit menjëherë i është ofruar ndihma mjekësore dhe më pas është transferuar në QKUK,” thuhet në njoftimin e policisë.
Drejtori i Qendrës Klinike Universitare të Kosovës (QKUK), Naser Syla, ka konfirmuar se personi i lënduar është duke u trajtuar në Qendrën Emergjente.
“Po, ndodhet në Qendrën e Emergjencës dhe është duke u trajtuar. Janë duke u kryer ekzaminimet e nevojshme. Gjendja është jo stabile, bëhet fjalë për një politraumë të rëndë”, deklaroi Syla, përcjell Telegrafi.com
Policia ka bërë të ditur se në bashkëpunim me akterët tjerë relevantë, është duke ndërmarrë të gjitha veprimet e nevojshme për zbardhjen e plotë të rrethanave të këtij rasti.
