Profesori amerikan i marrëdhënieve ndërkombëtare, Alon Ben Meir, ka reaguar ndaj krizës së vazhdueshme politike në Kosovë, duke e quajtur atë një “uzurpim të rrezikshëm të demokracisë”.
Në një shkrim të publikuar në faqen e tij zyrtare, Ben Meir thekson se është e paimagjinueshme që një shtet i vogël, me sfida të mëdha ekonomike dhe tensione të vazhdueshme me fqinjët, po funksionon tash e katër muaj me një qeveri në detyrë.
“Është e vështirë të imagjinohet se si një vend i vogël që po përjeton vështirësi të mëdha ekonomike dhe ndodhet në konflikt të vazhdueshëm me fqinjët e tij, është ende nën një qeveri kujdestare katër muaj pas zgjedhjeve kombëtare. Kryeministri Kurti duhet t’i japë fund bllokadës, pasi kjo situatë nuk flet mirë për të në momentin kur, pashmangshëm, do të mbahen zgjedhje të reja”, shkruan Ben Meir.
Profesori amerikan i ka bërë thirrje liderit të LVV-së, Albin Kurti, që të marrë përgjegjësinë dhe të dalë nga kjo situatë e bllokuar, duke theksuar se vazhdimi i kësaj gjendjeje mund të ketë pasoja të rënda politike për të.
Ben Meir gjithashtu ka vlerësuar propozimin e kreut të LDK-së, Lumir Abdixhiku, për krijimin e një qeverie uniteti kombëtar të përkohshme si një zgjidhje të mundshme për tejkalimin e krizës.
“Propozimi i liderit të Lidhjes Demokratike të Kosovës për një qeveri uniteti kombëtar të udhëhequr nga një figurë politikisht neutrale – ku liderët e partive përjashtohen nga rolet ekzekutive dhe ministritë drejtohen nga profesionistë të të gjitha partive – duhet të merret seriozisht në konsideratë dhe të caktohet një datë e re për zgjedhjet”, thekson ai.
Sipas tij, një qeveri kalimtare do të duhej të rikthente funksionalitetin institucional dhe të siguronte zbatimin e reformave urgjente, para se vendi të shkojë në zgjedhje të reja.
