Për të përballuar më mirë fluksin e vizitorëve gjatë verës, autoritetet në Durrës kanë vendosur që bulevardi “Epidamn” të funksionojë si zonë pedonale çdo mbrëmje në korrik dhe gusht.
Sipas njoftimit të Policisë Bashkiake, nga 1 korriku deri më 31 gusht 2025, në intervalin kohor 18:00–23:00, do të ndalohet qarkullimi dhe parkimi i automjeteve në segmentin nga Prefektura deri te Torra Veneciane.
Kjo nismë synon të krijojë një mjedis më të qetë dhe të aksesueshëm për këmbësorët, duke shtuar sigurinë dhe komoditetin për banorët dhe pushuesit.
“Orari i planifikimit te bllokimit te pedonales është nga data 1 korrik deri me 31 gusht 2025 nga ora 18:00 deri ne orën 23:00. Ky bulevard do te jetë i bllokuar, i ndaluar qarkullimi dhe parkimi i te dyja anëve për mjetet, pasi do të jetë një pedonale për turistet dhe qytetarët e Durrësit”, thotë Ervis Quku shefi Qarkullit policia Bashkiake.
Me rritjen e përditshme të numrit të turistëve, autoritetet po zbatojnë masa konkrete për të përmirësuar cilësinë e qëndrimit në qytet. Kthimi i bulevardit në një hapësirë të dedikuar për ecje dhe aktivitete kulturore që pritet të gjallërojë jetën urbane dhe të nxisë më shumë gjallëri në zemër të Durrësit.
