Anna Wintour, kryeredaktorja e njohur e revistës amerikane Vogue, ka njoftuar dorëheqjen nga pozicioni që mbante prej 37 vitesh. Lajmi u bë i ditur në një takim të stafit më 25 qershor.
Wintour, 75 vjeçe, do të vazhdojë të punojë si drejtoreshë globale e përmbajtjes në Condé Nast (kompani mediatike ndërkombëtare shumë prestigjioze, e njohur për botimin e disa prej revistave më të famshme në botë, kryesisht në fushën e modës) dhe si drejtoreshë editoriale globale e Vogue, duke mbikëqyrur të gjitha markat kryesore të grupit, përfshirë Vanity Fair, GQ dhe AD.
Anna Wintour iu bashkua Vogue në vitin 1988, duke marrë drejtimin nga redaktorja paraprake, Grace Mirabella. Një prej ndryshimeve të para që solli ajo ishte një kopertinë historike në nëntor 1988, ku shfaqej modelja Michaela Bercu me xhinse prej 50 dollarësh, e kombinuar me një pulovër të kushtueshme Christian Lacroix, një kombinim që ndryshoi stilin klasik të Vogue dhe lajmëroi një epokë të re në botën e modës.
Në një intervistë për Vogue në 2012, Wintour tregoi:
“Ishte krejt ndryshe nga kopertinat tipike të Vogue në atë kohë, që ishin shumë të punuara, me makijazh dhe bizhuteri të mëdha. Kjo kopertinë thjesht ndryshoi të gjitha rregullat.”
Në karrierën e saj, ajo njihet edhe për futjen e personazheve të famshëm në kopertinat e revistës, një praktikë që më vonë u ndoq nga shumë revista të tjera.
Figura e Anna Wintour ka qenë burim frymëzimi edhe për personazhin Miranda Priestly në filmin “The Devil Wears Prada”. Libri dhe filmi, të bazuar në përvojat e asistentes së saj të mëparshme, Lauren Weisberger, portretizojnë një udhëheqëse të fortë dhe kërkuese në botën e modës.
Në vitin 2009, Wintour hapi dyert e Vogue me dokumentarin “The September Issue”, që tregonte përgatitjet e numrit më të madh të shtatorit të revistës.
Që nga viti 2013, ajo ka shërbyer edhe si drejtuese artistike e Condé Nast, ndërsa në vitin 2019 mori edhe rolin e këshilltares globale për përmbajtjen. Aktualisht, ende nuk është caktuar personi që do të zëvendësojë Anna Wintour në rolin e redaktores së Vogue.
