Presidenti i Shteteve të Bashkuara të Amerikës, Donald Trump, ka përmendur sërish Kosovën dhe Serbinë, pak ditë pasi që nëpërmjet një deklarimi në rrjetin social, ai u zotua se do të angazhohet sërish për normalizimin e marrëdhënieve mes dy vendeve.
Në një deklarim për media kësaj here, presidenti Trump tha se e ka ‘‘përfunduar’’ çështjen mes Kosovës dhe Serbisë, dy vende që ‘‘kanë luftuar për vite me radhë’’, shkruan Gazeta Express.
‘‘Siç e dimë, bëmë një punë shumë të shkëlqyer me Indinë dhe Pakistanin. Dhe është një gjë e bukur për t’u parë. Serbia dhe Kosova po ashtu, kanë luftuar për vite me radhë, dhe ne e përfunduam këtë çështje’’, ka thënë ai.
Po ashtu ai ka thënë edhe se do të duhej të ishte shpërblyer me Çmimin Nobe për zgjidhjen e çështjeve si rasti i Kosovës dhe i Serbisë.
‘‘Duhet të më jepnin çmimin Nobel për Ruandën dhe a e keni parë rastin e Kongos? Mund të thoni Serbia dhe Kosova. Mund të thoni shumë prej tyre. Më i madhi është India dhe Pakistani. Duhet ta kisha marrë katër ose pesë herë”, ka deklaruar ai.
Presidenti Trump, para gazetarëve u deklaruar edhe për situatën mes Izraelit dhe Iranit, duke thënë se është “shumë e vështirë” t’i kërkohet Izraelit të ndalë sulmet – një kërkesë që Irani i kishte drejtuar më herët SHBA-së, .
Trump më pas tha se Irani “nuk dëshiron të flasë me Europën” dhe se “duan të flasin me ne (SHBA-në)”.
Ai shtoi: “Europa nuk do të jetë në gjendje të ndihmojë në këtë pikë.”
I pyetur nëse një vendim për të goditur Iranin do të ishte më i rëndësishmi që do të merrte si president, Trump u përgjigj:
“Nuk mund t’ju them tani. Do t’jua them pas rreth një viti… nuk i dihet kurrë me këto lloj vendimesh.”raporton Sky News
Ai tha gjithashtu se “mundet” që të mbështesë një armëpushim mes Izraelit dhe Iranit, “në varësi të rrethanave”, përcjell Express.
Në lidhje me konfliktin, Trump shtoi:
“Është paksa e vështirë t’i thuash dikujt të ndalë.”
Sipas tij, “Izraeli po shkon shumë mirë në këtë luftë, ndërsa Irani, mund të thuhet, po ecën më dobët.”
