Kryeministri në detyrë i Republikës së Kosovës, Albin Kurti, i shoqëruar nga ministri në detyrë i Shëndetësisë, Arben Vitia dhe Kryetari i Komunës së Shtimes, Qemajl Aliu, sot morën pjesë në vendosjen e gurthemelit për ndërtimin e objektit të ri të Qendrës Kryesore të Mjekësisë Familjare në Shtime.
Me një vlerë të gjithmbarshme të investimit prej 2.4 milionë euro, objekti i ri i Qendrës Kryesore të Mjekësisë Familjare, do të ketë një hapësirë prej 3 mijë katrorë, brenda së cilës do të përfshihen laboratori, radiologjia, urgjenca, stomatologjia si dhe hapësirat për trajtim mjekësor, vaksinimin, imunizim dhe hapësira për administratë.
Ndërtimi i objektit te ri pritet të realizohet brenda një periudhe prej 30 muajsh. Ky investim përveç rritjes për shërbime për qytetarët do të ndikojë edhe në ngritjen e cilësisë edhe efikasitetit, meqenëse kushtet do të jenë moderne.
Kryeministri Kurti falënderoi mjekët, infermierët dhe punëtorët shëndetësorë, për kontributin dhe për të gjitha sukseset e arritura jo vetëm në mjekësinë e shëndetësinë ne Komunën e Shtimes, por në gjithë vendin.
Kryetari i Komunës, Qemajl Aliu, tha se Komuna e Shtimes po ndryshon për së mbari, teksa u shpreh i lumtur që sot ndodhen aty së bashku me kryeministrin e ministrin si dhe stafin shëndetësor në vendosjen e gurthemelit. Ai shtoi se siç janë zotuar, Komuna e Shtimes se shpejti do te ketë mjekësinë primare model për gjithë Kosovën, me një infrastrukturë moderne, por edhe me pajisje të reja.
Ndërkaq, ministri i Shëndetësisë, Arben Vitia, tha se si Ministri e Shëndetësisë, përveçse në infrastrukturën spitalore, po vazhdojnë me investime të shumta në nivelin primar, sepse niveli primar është niveli ku shumica e qytetarëve kërkojnë shërbime shëndetësore.
Deklarimi i plotë për media i Kryeministrit Kurti:
Jemi këtu në Komunën e Shtimes, bashkë me nikoqirin, kryetarin, Dr. Qemajl Aliun dhe me ministrin e Shëndetësisë në detyrë, Arben Vitinë, për të vënë gurthemelin e Qendrës Kryesore të Mjekësisë Familjare, një zotim i yni dhe një pritje e nevojë e kamotshme e qytetarëve të Shtimes.
Qendra Kryesore e Mjekësisë Familjare në Shtime do t’i ketë gjithsej rreth 3 mijë metra katrorë; me ç’rast suterreni, përdhesja dhe kati i parë secila do të jetë përafërsisht nga 1 mijë metra katrorë.
Në suterren do të jenë Laboratori dhe Radiologjia, në përdhese do të jetë trajtimi mjekësor, urgjenca, vaksinimi dhe imunizimi, ndërkaq në katin e parë do të jetë administrata dhe Stomatologjia.
Kostoja e gjithmbarshme është afër 2.4 milionë euro, ndërkaq punimet do të realizohen përbrenda një periudhe prej 30 muajsh apo dy vjet e gjysmë, që i bie se në fund të vitit 2027 ne do ta përurojmë objektin e ndërtuar të Qendrës Kryesore të Mjekësisë Familjare në Shtime.
Do të rriten edhe shërbimet, por gjithashtu do të ngritet si cilësia edhe efikasiteti, meqenëse kushtet do të jenë moderne e po ashtu edhe të sigurta.
Unë falënderoj shumë mjekët, infermierët, punëtorët shëndetësorë, të cilët kanë dhënë aq shumë për mjekësinë e shëndetësinë jo vetëm në Shtime, që janë bashkë këtu me neve edhe ata që nuk janë bashkë këtu me neve, sepse ky është një kontribut dhe sukses i përbashkët e i përgjithshëm.
Faleminderit shumë, e gëzofshi!
