Kombëtarja shqiptare ka kaluar në avantazh ndaj Letonisë në ndeshjen që po zhvillohet në Riga, falë një performance mbresëlënëse të portierit Thomas Strakosha dhe një goli të Rey Manajt në minutën e 29-të.
Në minutën e 18-të, gjyqtari kryesor i ndeshjes, arbitri turk, akordoi një penallti në favor të Letonisë pas një kontakti mes mbrojtësit Marash Kumbulla dhe një sulmuesi letonez.
Vendimi u kontestua ashpër nga ekipi shqiptar, por gjyqtari qëndroi i palëkundur, edhe pas konsultimit me sistemin VAR.
Thomas Strakosha u shfaq vendimtar në atë moment, duke pritur penalltinë dhe duke i dhënë zemër skuadrës kuqezi.
Vetëm pak minuta më pas, në minutën e 29-të, Shqipëria shpërbleu përpjekjet e saj me golin e epërsisë.
Sulmuesi Rey Manaj shfrytëzoi një mundësi të mirë për të mposhtur portierin kundërshtar dhe për të kaluar kuqezinjtë në avantazh.
