Presidenti i sapozgjedhur i Polonisë, Karol Nawrocki, aktualisht kundërshton anëtarësimin e Ukrainës në Bashkimin Evropian, por njeh rëndësinë strategjike të mbështetjes së saj në luftën e tij kundër agresionit rus.
Ai e tha këtë në një intervistë me mediumin hungarez Mandiner, raporton Ukrinform duke iu referuar The European Conservative.
“Unë kundërshtoj anëtarësimin e Ukrainës në BE në këtë moment. Megjithatë, e kuptoj se ne duhet ta mbështesim Ukrainën nga një këndvështrim strategjik dhe gjeopolitik”, citohet të ketë thënë Nawrocki.
Presidenti i sapozgjedhur i Polonisë e quajti Rusinë “një shtet post-imperial, neo-komunist të udhëhequr nga krimineli i luftës Vladimir Putin”.
Ai shtoi se kishte marrë personalisht kërcënime nga Rusia për shkak të punës së tij si kreu i Institutit të Kujtimit Kombëtar të Republikës së Polonisë që nga viti 2021, përcjell Telegrafi.
Pavarësisht gjithçkaje, ai vlerësoi lart heroizmin e ukrainasve: “Unë besoj se Ukraina po mbron veten me shumë guxim, por gjithashtu duhet të respektojë interesat e vendeve të tjera, veçanërisht pasi ata e mbështetën atë që nga fillimi. Dhe Polonia ka qenë një lider në këtë drejtim, falë angazhimit të Presidentit [në largim] Duda dhe mikpritjes së popullit polak”.
