Kandidatja për kryeparlamentare, Albulena Haxhiu pas dështimit numër 26 për konstituimin e kuvendit foli për media.
Haxhiu tha se opozita po përpiqet që të mos formohet Qeveria Kurti 3,
“Siç e keni parë 18 seanca prej kur ka filluar propozimi për komisionin e fshehtë, 18 herë deputetët e opozitës ishin të pranishëm dhe nuk morën pjesë në votim. Unë kam thënë që nuk duhet të votojnë pro. Shihni sa i përket kësaj çështje, ne kemi thënë që qëllimi është të pamundësohet Qeveria Kurti 3. Po përpiqen maksimalisht që të mos bëhet Qeveria Kurti 3.”, tha ajo.
Tutje, Haxhiu u shpreh se nuk e kupton qëndrimin e opozitës.
“Ne jemi shumë të hapur që të takohemi me subjektet politike. Të gjitha propozimet tona janë hedhur poshtë. Unë nuk e kam të qartë se cili është qëndrimi real i tyre.”, shtoi ajo.
Kandidatja për kryeparlamentare tha se mund të mbahen dy palë zgjedhje në vjeshtë nëse nuk konstituohet kuvendi, shkruan lajmi.net
“Për ne ka pasur rëndësi që të konstituohet kuvendi e të formohet qeveria. Nganjëherë të shkon mendja se nuk po e pranojnë rezultatin e zgjedhjeve. Nuk mund të përjashtohet që të mbahen dy palë zgjedhjet bashkë. Nëse mbahet peng, nuk konstituohet Kuvendi, atëherë e vetmja zgjidhje tjetër janë zgjedhjet, ndonëse ne e dimë se pa u konstituar Kuvendi nuk mund të shkohet në zgjedhje, por kjo mund të bëhet lehtësisht me një marrëveshje politike.”, përfundoi ajo.
