Sarajeva po përballet me një krizë të rëndë shëndetësore dhe mjedisore për shkak të një shpërthimi të infeksioneve të shkaktuara nga leptospiroza, e njohur ndryshe si “ethet e minjve”.
Kjo situatë ka çuar në shpalljen e një epidemie nga autoritetet lokale.
Sipas raportimeve të mediave, qyteti është përfshirë nga një numër i madh minjsh, të cilët janë parë duke notuar në lumin Miljacka dhe duke u shfaqur në zona të ndryshme urbane. Kjo përhapje e minjve është ndihmuar nga menaxhimi i dobët i mbeturinave dhe mungesa e pastrimit të rregullt të hapësirave publike.
Leptospiroza është një sëmundje infektive që transmetohet përmes kontaktit me urinën ose jashtëqitjet e kafshëve të infektuara, veçanërisht minjve.
Simptomat përfshijnë ethe, dhimbje muskujsh dhe në raste të rënda, dëmtime të mëlçisë dhe veshkave. Në një periudhë 24-orëshe, janë raportuar dymbëdhjetë raste të reja në spitalin kryesor të qytetit.
Për të përballuar këtë situatë, autoritetet kanë ndërmarrë masa emergjente, duke përfshirë pastrimin e hapësirave publike, dezinfektimin dhe kontrollin e popullatës së minjve. Shkollat janë udhëzuar të pastrojnë ambientet e tyre dhe të kontrollojnë për praninë e minjve, transmeton Telegrafi.com
Deri më tani, nuk janë raportuar raste të rënda ose vdekje nga leptospiroza, por autoritetet vazhdojnë të monitorojnë situatën dhe të ndërmarrin masa për të parandaluar përhapjen e mëtejshme të sëmundjes.
