Kryeqyteti i Ukrainës, Kiev, u vu nën një sulm në shkallë të gjerë me dron dhe raketa ruse gjatë natës së së shtunës, vetëm disa orë pasi Rusia dhe Ukraina filluan një shkëmbim të madh të të burgosurve.
Të paktën tetë persona u plagosën në sulmet, të cilat shkaktuan zjarre dhe lanë mbeturina të shpërndara në rrethe në të gjithë qytetin, tha kryetari i bashkisë së qytetit Vitali Klitschko në një postim në Telegram.
Klitschko tha se dy banorë kishin kërkuar trajtim spitalor dhe se njësitë e mbrojtjes ajrore ishin në veprim, raportoi Reuters, duke shtuar se fragmente nga një dron goditën katin e fundit të një ndërtese apartamentesh.
Shpërthimet dhe sirenat e forta mund të dëgjoheshin në të gjithë kryeqytetin në videon e shpërndarë nga agjencia e lajmeve Reuters. Po ashtu, edhe disa zjarre mund të shiheshin.
Timur Tkachenko, kreu i administratës ushtarake të Kievit, tha se një zjarr kishte shpërthyer në dy kate të një ndërtese apartamentesh në distriktin Dniprovskyi.
Zyrtarët raportuan gjithashtu një zjarr në Obolon në periferinë veriore të qytetit dhe mbeturina të rënë në një qendër tregtare në të njëjtën zonë.
Sulmi erdhi pasi Rusia dhe Ukraina përfunduan fazën e parë të asaj që pritet të jetë shkëmbimi më i madh i të burgosurve që nga fillimi i luftës.
Shkëmbimi filloi të premten dhe do të vazhdojë të shtunën dhe të dielën, me Kievin dhe Moskën që pritet të shkëmbejnë 2000 persona – 1000 nga secila anë.
