Me rastin e Ditës së Evropës, Presidentja e Kosovës, Vjosa Osmani, ka theksuar rëndësinë e vlerave themelore që ndajnë Republika e Kosovës dhe Bashkimi Evropian: demokracia, të drejtat e njeriut dhe sundimi i ligjit.
“Në Ditën e Evropës, reflektojmë mbi vlerat që qëndrojnë në themel të Republikës sonë dhe të Bashkimit Evropian: demokracinë, të drejtat e njeriut dhe sundimin e ligjit. Këto vlera kanë qenë dhe mbeten udhërrëfyes në rrugëtimin tonë drejt integrimit në Bashkimin Evropian, si dhe në forcimin e përditshëm të shtetit tonë”, thuhet në deklaratën e saj.
Presidentja theksoi se kjo ditë është dëshmi e përkushtimit të palëkundur të popullit të Kosovës për t’i përqafuar këto vlera evropiane, pavarësisht sfidave dhe padrejtësive që e kanë shoqëruar procesin e integrimit.
Në këtë kuadër, Osmani kërkoi me forcë heqjen e masave të padrejta të vendosura nga BE-ja ndaj Kosovës dhe kritikoi mungesën e reagimit serioz ndaj politikave destabilizuese të Serbisë.
“Ai që sot po rrezikon stabilitetin dhe sigurinë e kontinentit tonë është Putini, tek i cili Vuçiq vendosi ta shënojë Ditën e Evropës. Kjo është një dëshmi më shumë për orientimin e Serbisë dhe nevojën që BE-ja të ndalë politikat akomoduese ndaj saj”, theksoi ajo, përcjell Telegrafi.com
Presidentja përfundoi duke rikujtuar se nëse vërtet duam një Evropë të lirë, të bashkuar dhe të plotë, atëherë është koha që populli më pro-evropian në kontinent të mos ndëshkohet më, por të trajtohet me dinjitet dhe drejtësi.
