Presidenti turk Recep Tayyip Erdogan ka zhvilluar një bisedë telefonike me kryeministrin pakistanez Shehbaz Sharif për të shprehur solidaritetin e tij pasi India goditi Pakistanin dhe Kashmirin me raketa, njoftoi presidenca turke.
Pakistani, i cili ka lidhje të forta me Turqinë, tha se kishte rrëzuar pesë aeroplanë indianë dhe u zotua të hakmerret më tej, në përplasjen më të keqe midis fqinjëve të armatosur bërthamor në më shumë se dy dekada.
Bëhet e ditur se gjatë telefonatës, Erdogan i tha Sharifit se Turqia mbështet atë që ai i quajti “politikat e qeta dhe të përmbajtura” të Pakistanit.
Erdogan tha gjithashtu se e konsideroi “të përshtatshme” thirrjen e Islamabadit për një hetim mbi një sulm militant islamik që shkaktoi krizën,
Raportohet se militantët vranë 26 persona në Kashmir në sulmin e 22 prillit. Pakistani mohon akuzat indiane se ishte i lidhur me sulmin.
“Erdogan deklaroi se Turqia ishte e gatshme të bënte gjithçka që mundet për të parandaluar përshkallëzimin e tensioneve dhe se kontaktet e tij diplomatike në këtë drejtim do të vazhdojnë”, thuhet në deklaratë.
Ndryshe, Turqia e ka dënuar më parë sulmin e Indisë dhe u ka bërë thirrje të dyja palëve të veprojnë me sens të përbashkët.
Ministria e Jashtme e Turqisë tha se veprimi i fundit ushtarak nga India krijon rrezikun e një “lufte të gjithanshme”, shkruan Reuters, përcjell Telegrafi.
Ankaraja mban gjithashtu lidhje të përzemërta me Indinë.
