Ish-gjyqtari i Gjykatës Kushtetuese, Kadri Kryeziu, thotë se ndryshimi i procedurës për zgjedhjen e kryeparlamentarit nga votimi i hapur në atë të mbyllur nuk përbën shkelje kushtetuese.
Kryeziu, megjithatë, thotë se, procedura e zgjedhjes së kryeparlamentarit duhet të vazhdohet me votim të hapur ashtu siç ka filluar.
“Ka dy forma të votimit i hapur dhe i mbyllur. Votimi fshehtë është pak më i sigurt se i hapur… Kjo është një seancë konstituive dhe meqë janë marrë vesh për votim të hapur kjo duhet të përfundojë deri në fund me votim të hapur. Të drejtë kanë, por nëse dëshirojnë deputetët me u marrë vesh përsëri me ndërru votimin kanë mundësi. Përndryshe duhet vazhduar me votim të hapur. S’ka (shkelje kushtetuese) kjo është e rregulluar me rregullore nëse shkelet atëherë ka shkelje të rregullores së punës së Kuvendit”, tha Kryeziu për RTV21.
Ndryshe, të enjten deputetët dështuan për të nëntën herë radhazi në përpjekjen e tyre për ta konstituuar Kuvendin e Kosovës.
Kuvendi i Kosovës përmes një komunikate për media ka njoftuar për seancën e radhës për konstituimin e Kuvendit të Kosovës që do të mbahet të shtunën.
Seanca do të mbahet në orën 10:00, ku LVV si parti e parë në zgjedhje do të provojë përsëri të zgjedh kryetaren e Kuvendit.
Më 1 maj, kryesuesi i seancës konstituive, Avni Dehari nga Lëvizja Vetëvendosje (LVV), kërkoi që votimi për kryetar të Kuvendit të bëhet në mënyrë të fshehtë, gjë që u refuzua nga partitë e tjera.
Procesi ka ngecur prej javësh pasi partia fituese, LVV, nuk po arrin t’i sigurojë votat e nevojshme për kandidaten e saj për kryetare të Kuvendit, Albulena Haxhiu.
Ajo shihet nga disa parti parlamentare si “figurë përçarëse”, por Vetëvendosje ngul këmbë se ajo është kandidate meritore.
