Kryetari i Komunës së Prishtinës, Përparim Rama, ka akuzuar Qeverinë për bllokim të disa projekteve të rëndësishme në kryeqytet, përfshirë edhe ato që ishin planifikuar me mbështetje të huaj financiare.
Rama tha se ndonëse komuna po vazhdon punimet në shumë pjesë të qytetit, ka projekte që janë bllokuar nga niveli qendror, për arsye që ai i cilësoi politike.
“Ne jemi duke punuar në të gjitha pjesët e kryeqytetit dhe po i vazhdojmë punët aty ku Qeveria nuk ka mundur t’i bllokojë. Por, aty ku kanë pasur mundësi ta bëjnë, nuk e kanë humbur rastin për të bllokuar”, tha Rama në DebatPlus.
Ai përmendi si shembull projektin e unazës së kryeqytetit, për të cilin tha se buxheti prej 204 milionë eurosh ishte miratuar, përfshirë edhe 84 milionë euro në formë grantesh.
Sipas tij, ky projekt ka qenë i gatshëm për zbatim që tri vite më parë, por është ndalur nga Qeveria.
“Është një projekt madhor për Prishtinën dhe qytetarët, por fatkeqësisht është bllokuar për arsye të pastra politike – nga parti apo individë që shiten si njerëz që ia duan të mirën vendit, por në fakt veprojnë kundër zhvillimit të kryeqytetit,” tha ai.
Rama njoftoi gjithashtu se Komuna e Prishtinës ka nisur kallëzime penale ndaj çdo individi apo qytetari që, sipas tij, pengon zhvillimin e projekteve në kryeqytet.
