Myftiu i Bashkësisë Islame të Kosovës, Naim Tërnava, ka shprehur ngushëllime për vdekjen e Papa Françeskut.
“Me dhembshuri mora lajmin për ndarjen nga jeta të udhëheqësit të Kishës Katolike, Papa Françeskut. Me një përkushtim të jashtëzakonshëm, ai i shërbeu paqes, humanizmit, dinjitetit njerëzor dhe bashkëjetesës ndërfetare në mbarë botën. Në emër të Bashkësisë Islame të Kosovës, të institucioneve të saj, si dhe në emrin tim personal, shpreh ngushëllimet më të sinqerta për shtetin e Vatikanit – selinë qendrore të Kishës Katolike – për Kishën Katolike në vendin tonë, si dhe për të gjithë besimtarët katolikë.”
Tërnava ka thënë se Papa Françesku ishte zë i fuqishëm i dialogut dhe urtësisë.
“Papa Françesku ishte një zë i fuqishëm i dialogut dhe urtësisë gjatë gjithë misionit të tij. Ai u angazhua me përkushtim për ndërtimin e urave të mirëkuptimit ndërmjet feve dhe popujve. Punoi pa u lodhur për promovimin e paqes dhe të vlerave fetare, duke lënë pas një trashëgimi të çmuar për brezat që vijnë.”
