Policia e Kosovës i ka arrestuar shtatë persona të dyshuar për “planifikimin dhe kryerjen e vrasjes” së rreshterit Muhamed Lika, e cila besohet se u krye për motive që ndërlidhen me punën e tij zyrtare, thanë autoritetet të hënën.
Pas aksionit të fundit të Policisë së Kosovës dhe Prokurorisë Themelore në Ferizaj, Hilmi Canolli, Ish-hetues policor ka reaguar duke e përshëndetur veprimin institucional, por njëkohësisht duke ngritur shqetësime serioze mbi natyrën e rastit dhe rrezikun e humbjes së provave nëse hetimet nuk menaxhohen me kujdes.
“Aksioni i Policisë dhe Prokurorisë në Ferizaj është për t’u përshëndetur. Megjithatë, në raste të tilla, çdo hap i gabuar mund të çojë në humbjen e gjurmëve dhe provave që janë kyçe për zbardhjen e rastit”, tha Canolli në Dukagjin.
Sipas tij, të gjitha të dhënat e deritanishme tregojnë se kemi të bëjmë me një grup të mirëorganizuar, i cili ka ndjekur sistematikisht një zyrtar policor deri në hyrjen e banesës së tij. Ai shton se kjo mënyrë e veprimit lë pak vend për dyshime se qëllimi mund të ketë qenë vetëm ekzekutimi i tij.
“Nëse qëllimi ishte vrasja, ajo mund të ishte kryer në rrugë. Por përzgjedhja e një personi të mitur për të kryer aktin, sugjeron një mesazh më të thellë dhe ndoshta një motiv të koduar që duhet të zbulohet. Kjo është ajo që duhet të hulumtohet në thelb – pse u zgjodh pikërisht një i mitur dhe çfarë po tenton të komunikojë ky grup?”
Ai paralajmëron institucionet që të mos nxitojnë me veprime të fragmentuara, por të fokusohen në identifikimin e motiveve reale, të zbulojnë nëse ka një strukturë më të madhe të organizuar, kush qëndron prapa saj, si financohet dhe çfarë mesazhi përpiqet të përcjellë përmes frikësimit të pjesëtarëve të organeve të sigurisë.
“Policia nuk duhet të nxitohet me veprime dhe të shikohet motivi kryesor, se cilët janë personat mbrapa, a kemi numër më të madh të njerëzve të organizuar, kush i financon, cila është porosia e tyre për frikësimin e organeve të sigurive. Situatë ndryshe, organet e sigurisë i kanë lënë pas dore këto grupe të ndryshme”, deklaroi ai.
