Presidentja e Kosovës, Vjosa Osmani, ka thënë se Zyra e Presidencës ka bërë gati një ligj që do të mundësonte heqjen e tarifave prej 10 për qind ndaj mallrave të importuara nga SHBA-ja, por se për miratimin e këtij ligji duhet fillimisht të konstituohet Kuvendi i ri.
“Ne e kemi gati ligjin që do t’ia propozojmë Kuvendit në momentin që konstituohet. Kam diskutuar me shumë deputetë, jam e bindur që do të kalojë”, tha Osmani në një intervistë për RTV 21.
Osmani ka thënë se propozimi i saj për heqje të tarifave ndaj ShBA-së, ka qenë një moment i mirë pët të treguar se kush është shteti më aleat i ShBA-së.
Ajo ka vlerësuar se Kosova tashmë ka humbur faktin, duke thënë se reagimet nga zyrarët e qevrisë ishin “mbi të gjitha me mungesë të njohurive bazike se si funksionon kushtetuta dhe si funksionojnë institucionet e Kosovës”.
ShBA kishte vendosur tarifa prej 10 përqind për mallrat e Kosovës në vendimin e Trump për vendosje të tarifave për shumë vende të botës.
Vendimi i Trump është pezulluar për një periudhë prej 90 ditë.
