Deputeti i Lidhjes Demokratike të Kosovës, Avdullah Hoti, pas zgjedhjeve të 9 shkurtit ka kërkuar reflektim të thellë dhe përgjegjësi nga strukturat drejtuese të partisë. Ai ka theksuar nevojën për një proces zgjedhor të brendshëm me qëllim riorganizimin e LDK-së.
Në një intervistë për gazetën Nacionale, Hoti ka deklaruar se brenda LDK-së nuk ka vend për fraksione apo grupime të brendshme.
Ai është shprehur i zhgënjyer me rezultatin e zgjedhjeve dhe ka theksuar se, ndonëse përpjekjet e anëtarëve kanë qenë maksimale, ato nuk kanë mjaftuar për të fituar besimin e qytetarëve.
“Qëndrimin tim e kam paraqitur në Kryesinë e LDK-së. Mendoj se duhet të fillojmë një proces të ri riorganizimi, nga niveli i nëndegëve deri te lidershipi i partisë. Rezultati na ka dëshmuar se, pavarësisht përpjekjeve tona, nuk kemi arritur të bindim qytetarët. Prandaj, është e domosdoshme të reflektojmë dhe të ristrukturohemi në të gjitha nivelet”, tha Hoti.
Sipas tij, ky riorganizim mund të arrihet vetëm përmes një procesi të brendshëm zgjedhor, i cili duhet të jetë gjithëpërfshirës, transparent dhe në përputhje me statutin e partisë. Ai ka kujtuar se një proces i ngjashëm ndodhi edhe pas zgjedhjeve të vitit 2021, kur LDK ndërmori hapa për të rikthyer stabilitetin dhe besimin..
“Pas këtij rezultati, është koha të rindërtojmë besimin. Unë besoj se LDK jo vetëm që ka mundur të fitojë në këto zgjedhje, por mund të dalë fituese në çdo garë, nëse arrin të bashkojë të gjitha shtresat brenda saj – të rinjtë, profesionistët, gratë dhe burrat – në një platformë të përbashkët dhe vizionare”, përfundoi Hoti.
