Presidentja e Kosovës, Vjosa Osmani, në një intervistë me influencerin australian Mario Nawfal, ka deklaruar se Rusia nuk ka asnjë të drejtë ta përdorë rastin e Kosovës si argument për aneksimin e territoreve në Ukrainë.
Ajo theksoi se pavarësia e Kosovës ishte rezultat i së drejtës së popullit për vetëvendosje dhe represionit brutal të regjimit të udhëhequr nga Sllobodan Millosheviq, ndërsa agresioni i Rusisë në Ukrainë, ka thënë ajo, është një pushtim ushtarak i paprovokuar.
“E vetmja ngjashmëri mes rasteve është krimet që kreu Millosheviqi ndaj nesh dhe ato që po kryen Putini ndaj ukrainasve. Por Kosova dhe territoret e pushtuara nga Rusia nuk kanë asgjë të përbashkët”, tha Osmani.
E para e shtetit tutje në këtë intervistë theksoi se qytetarët e Kosovës kanë pasur të drejtën legjitime për të vendosur për fatin e tyre, derisa banorët e rajoneve në Ukrainë si Donbasi janë bërë pjesë e një procesi të dhunshëm e të manipuluar nga Rusia.
“Prandaj, Rusia nuk ka asnjë justifikim që të flasë për ndonjë precedent që kinse ka krijuar Kosova”, u shpreh Osmani.
Osmani mohoi pretendimet për shtyrjen e agjendave të rrezikshme përmes USAID-it në Kosovë, duke theksuar kontributin pozitiv të projekteve amerikane në zhvillimin ekonomik dhe fuqizimin e drejtësisë.
Presidentja Osmani u shpreh se qasja ndryshe e Donald Trump ndaj Evropës shpesh ka rezultuar më efektive. Ajo tha se kritikat e tij ndaj partnerëve evropianë duhet parë si thirrje për ta marrë më seriozisht sigurinë dhe mbrojtjen. Sipas saj, raportet SHBA-BE nuk janë në rrezik, por kërkojnë përkushtim nga të dyja palët.
Në fund, ajo kritikoi disa vende evropiane që ende nuk e njohin Kosovën, duke thënë se mosrespektimi i vijës së politikës amerikane për Kosovën mund të cenojë paqen në rajon
