9 prilli 2008 shënon datë historike për shtetin e Kosovës. Në këtë datë u miratua Kushtetuta e Republikës së Kosovës, e cila hyri në fuqi me 15 qershor të atij viti.
Përmes kësaj kushtetute shteti i Kosovës definohet si një republikë demokratike parlamentare, e mbështetur në sovranitetin e popullit dhe në të drejtat e liritë e njeriut.
Ajo, po ashtu, njeh një spektër të gjërë të drejtash për pakicat etnike që jetojnë në Kosovë, në mënyrë të veçantë pakicën serbe.
Kushtetuta e Republikës së Kosovës ndjek modelet më të avancuara të kushtetutave të demokracive liberale perëndimore.
Në funksion të saj është Gjykata Kushtetuese e Kosovës, e cila përbën autoritetin final të interpretimit të përputhjes së ligjeve e vendimeve politike me kushtetutën dhe moscenimin e rendit kushtetues
Në 17 vitet e saj, Kushtetuta e Republikës së Kosovës, ka kaluar nëpër sfida të shumta, kryesisht të natyrës politike. Në shumë raste normat e saj janë sfiduar nga subjekte të ndryshme, sidomos nga komuniteti serb në veri të vendit, por edhe nga partitë politike shqiptare, të cilat shpesh kanê kontestuar aktgjykimet e Gjykatës Kushtetuese, siç është rasti me Lëvizjen Vetëvendosje.
Në 17 vite të saj, Kushtetuta e Republikës së Kosovës është ndryshuar vetëm një herë, në rastin e krijimit të Gjykatës Speciale.
