Kryeministri në detyrë, Albin Kurti po vazhdon takimet me partitë politike të pakicave, për t’u konsultuar me përfaqësues të tyre lidhur me formimin e qeverisë së re.
Ministri në detyrë i Zhvillimit Rural, Fikrim Damka, nga Partia turke Demokratike e Kosovës përfundoi një takim me Kurtin në qeveri.
Pas tij, deputetja boshnjake, kryetare e partisë Unionit Social Demokrat shkoi për t’u takuar me Kurtin.
Kurti të mërkurën nisi konsultimet me pakicat për formimin e qeverisë së re, duke u takuar me zëvendëskryeministren në detyrë nga komuniteti boshnjak, kryetaren e Partisë së Re Demokratike (NDS), Emilija Rexhepi, ministrin në detyrë për Komunitete dhe Kthim dhe kryetarin e Partisë për Liri, Drejtësi dhe Mbijetesë, Nenad Rashiq, si dhe me ministrin e Administrimit të Pushtetit Lokal dhe kryetarin e partisë egjiptiane Iniciativa e Re Demokratike e Kosovës (IRDK), Elbert Krasniqi.
Takimet e tilla në zyrën e kryeministrit, Eugen Cakolli nga koalicioni i organizatave joqeveritare, Demokracia në Veprim tha të mërkurën se janë “një praktikë që zbeh kufirin mes shtetit dhe partisë, dhe që tregon shumë për mënyrën si konceptohet pushteti”. Takimet e tilla, ai tha se “duhet të mbahen në seli partie ose në ambiente neutrale, e kurrsesi në zyra publike që u përkasin të gjithë qytetarëve”, raporton Gazeta Express.
LVV-ja ka marrë 42.30% të votave dhe do t’i ketë 48 ulëse në Kuvendin e Kosovës, sipas rezultateve përfundimtare të zgjedhjeve parlamentare të 9 shkurtit, të certifikuara javën e kaluar – që nënkupton se asaj do t’i nevojitet një partner nga ana e opozitarëve për të qëndruar më tej në pushtet. Partia Demokratike e Kosovës ka marrë 20.95% të votave (24 deputetë), ndërsa Lidhja Demokratike e Kosovës 18.27% (20 deputetë). Koalicioni i Aleancës për Ardhmërinë e Kosovës me Nismën dhe të tjerët ka marrë 7.06% të votave (8 deputetë – 5 AAK, 3 Nisma). Së bashku, opozitarët kanë më shumë mandate (52) sesa partia e parë.
