Nënkryetarja e Partisë Demokratike të Kosovës (PDK), Vlora Çitaku, ka kritikuar ashpër kryeministrin Albin Kurti për qasjen e tij ndaj institucioneve dhe komuniteteve jo-shumicë, duke e akuzuar për kapje të shtetit dhe pazare politike.
Çitaku ka bërë një paralelizëm me ish-liderët e Kosovës, duke e cilësuar Kurtin si një kryeministër që e ka shndërruar zyrën e shtetit në zyrë partie dhe që përdor pushtetin për presion politik në vend të dialogut.
“Mbyllni sytë për një çast dhe imagjinoni sikur Hashim Thaçi, Isa Mustafa apo Ramush Haradinaj të kishin bërë atë që po bën Albin Kurti sot. Do të kishte shpërthyer një revoltë e madhe”, ka thënë ajo.
Çitaku e ka akuzuar Kurtin se po i shkel ligjet, po i përbuz traditat dhe po i përdhos parimet që dikur i mbronte me pasion.
“Albin, Kosova nuk është parti. Kosova nuk është pronë. Ti nuk je mbi ligjin, nuk je mbi Kushtetutën, nuk je mbi dinjitetin e këtij populli që ka vuajtur për demokraci, jo për t’u shndërruar në spektatorë të një partie që kërkon të kontrollojë gjithçka”, ka theksuar Çitaku.
Ajo ka paralajmëruar se kjo qasje do ta çojë Kurtin drejt një fundi të turpshëm politik, duke shtuar se historia nuk fal dhe populli nuk harron.
