Aktivitetet e 81 mediave të huaja janë ndaluar në Rusi, tha sot prokurori i përgjithshëm Igor Krasnov, duke folur në Këshillin e Federatës.
Ndër këto media janë Politico, France Presse, Der Spiegel, Yle, El País, EUobserver, LRT, Delfi dhe media të tjera.
Siç thekson faqja e internetit sibir realii, autoritetet ruse për herë të parë ndaluan zyrtarisht aktivitetin në vend të një numri mediash të huaja në qershor 2024, pas vendimit të Bashkimit Evropian për të ndaluar “çdo aktivitet transmetimi” në territorin e tij nga tre media ruse – RIA Novosti, Izvestiya dhe Rossiyskaya Gazeta. Krasnov e përshkroi ndalimin e mediave të huaja si “hakmarrje “.
Sipas Igor Krasnov, 71 organizata të huaja u përfshinë në listën e “organizatave të padëshirueshme”, ndërsa tre organizata terroriste dhe 172 nga degët e tyre u ndaluan. “Organizatat e padëshiruara” përfshinin median e pavarur Radio Evropa e Lirë dhe të gjitha faqet e saj të internetit, kompaninë mediatike RFE/RF, kanalin televiziv Dozd, faqen e internetit Meduza dhe gazetën “Novaya Gazeta-Europe”.
Bllokimi masiv i faqeve, filloi në Rusi në vitin 2022, pas fillimit të pushtimit në shkallë të plotë të Ukrainës. Rregullatori rus i telekomunikacionit Roskomnadzor ka bllokuar platformat e mediave sociale Facebook, Twitter dhe Instagram. Një gjykatë ruse e ka cilësuar si ekstremiste veprimtarinë e kompanisë amerikane Meta, e cila është ndaluar në Rusi, transmeton T.CH
Autoritetet ruse në vitin 2024 kufizuan aksesin në një numër rekord faqesh interneti. Gjithsej 523,000 faqe interneti u bllokuan, nga të cilat rreth 106,000 u zhbllokuan më pas, ndërsa më shumë se 417,000 mbeten të bllokuara, numri më i madh i faqeve të internetit të bllokuara që nga viti 2012, shkruante faqja e internetit Verstka.
