Policia e Kosovës ka njoftuar qytetarët se nga 3 prilli do të fillojë dërgimi i gjobave të trafikut në adresë të pronarit të veturës për kundërvajtjet e identifikuara përmes kamerave dhe radarëve.
Përmes një postimi në rrjetin social në Facebook bëhet e ditur se gjobat do të dërgohen tek kundërvajtësit përmes Postës së Kosovës dhe përmes platformës e-Kosova.
“Çka duhet të dini? Pronari i automjetit do të pranojë gjobën në adresën e tij. Nëse ai nuk ishte drejtuesi i mjetit në momentin e shkeljes, është i detyruar të sigurojë të dhënat e shoferit. Mosdorëzimi i këtyre të dhënave sjell masa ligjore për personat fizik dhe juridik sipas nenit 254 të Ligjit nr. 08/L-186”, thuhet në njoftim, percjell Telegrafi.com
Po ashtu sipas njoftimit bëhet e ditur se qytetarët kanë edhe lehtësira të cilat janë: Përfitojnë 50% zbritje në pagesë, nëse e paguani brenda afatit ligjor dhe kanë të drejtën e ankesës nëse nuk pajtoheni me gjobën.
