Gjatë një interviste për emisionin “People” në Euronews Albania, fotografi Arian Mavriqi ka zbuluar se ka filmuar për herë të parë në Kosovë kastorin euroaziatik.
Mavriqi tha se kastori euroaziatik ka qenë i zhdukur në Ballkan për rreth 200 vjet por kohët e fundit ishte parë në Serbi dhe Kroaci, ndërsa tashmë është regjistruar edhe në kamerat e tij kurth në një zonë të Kosovës.
“Është kastori euroaziatik, një gjitar gjysmë-ujor që jeton kryesisht në ujë. Ky kastor ka qenë i zhdukur për rreth 200 vjet në të gjithë Ballkanin. Kohët e fundit, është parë në Serbi dhe Kroaci, ndërsa ne e filmuam në rajonin e Kosovës, afër Fushe-Kosovës. Lokacionin e mbajmë të fshehur për arsye të ruajtjes së tij, pasi nuk dëshirojmë që ta ekspozojmë ende në Shqipëri.
Mavriqi tregon se një banor i zonës i kishte dhënë informacionin për disa pemë që dukeshin të prera si me sopatë, dhe se kishte vendosur kamerat për të monitoruar situatën.
“Kur pashë se ishte i pranishëm në Serbi dhe Kroaci, kisha shpresë të madhe se mund të ishte edhe te ne. Mora disa fotografi nga një banor i zonës, që kishte parë drunj të prera si me sopatë dhe ishte habitur. Kur i pashë ato, ishte një moment i madh gëzimi, sepse kuptova që ishte kastori. Më pas vendosëm kamerat dhe arritëm ta filmonim. Megjithatë, nuk dimë ende nëse është çift, apo vetëm një individ,” tha Mavriqi.
Pas vendosjes së kamerave, ai arriti të filmonte dhe të dokumentonte shfaqjen e kastorit euroaziatik në Kosovë.
“Në vitin 2008, u bë një projekt për rikthimin e kësaj specieje, dhe një rast i fundit ishte në Çeki, ku u shpenzuan miliona euro për ndërtimin e një diga për një liqen. Ata arritën në përfundimin se vendi më i mirë për ndërtimin e digës ishte aty ku kishte qenë më parë kastori, sepse ai është një “inxhinier” i shkëlqyer digash, duke ushqyer gjithashtu me rrënjë pemësh dhe zambakë uji”, tha fotografi.
