Në Bashkimin Evropian ende nuk ka marrëveshje për t`i dhënë fund ndryshimeve sezonale të orës, megjithëse një propozim për këtë çështje ekziston prej shtatë vitesh.
Ndërsa Parlamenti Evropian ka votuar për t’i dhënë fund praktikës së ndërrimit të orës, shtetet anëtare të BE-së nuk mund të bien dakord nëse duhet të qëndrojnë në orën verore apo atë dimërore në mënyrë të përhershme.
“Ne e bëmë propozimin në vitin 2018 për të ndalur ndryshimet sezonale të orës, por çështja ka ngecur në Këshillin e BE-së. Bazuar në reagimet e Parlamentit Evropian, shteteve anëtare dhe akademikëve, Komisioni Evropian vendosi që është më e udhës t’u lihet vendeve anëtare që të vendosin mes tyre. Ende besojmë se një zgjidhje e koordinuar është e arritshme”, ka thënë Ana Kaisser – zëdhënëse Këshillit Evropian.
Sipas direktivës së Komisionit Evropian të vitit 2018, shtetet anëtare do të kenë ende mundësinë të zgjedhin mes orës standarde verore apo dimërore, por ajo do të mbetej e pandryshuar gjatë gjithë vitit.
Aktualisht, në territorin e BE-së ekzistojnë tri zona standarde kohore, ku shumica e shteteve anëtare – gjithsej 17 prej tyre – bëjnë pjesë në zonën e Evropës Qendrore, njëjtë si vendet e Ballkanit Perëndimor, shkruan RTK.
Megjithëse për këtë vendim nevojitet shumica e kualifikuar dhe jo unanimiteti, shtetet anëtare ende nuk kanë arritur një ujdi. Kjo çështje rikthehet në vëmendje sa herë vjen momenti i ndërrimit të orës, por deri më tani pa ndonjë veprim konkret.
