Me sulme ajrore të vazhdueshme, uri dhe pa ndihma në horizont, njerëzit në Gaza po dalin në rrugë – të zemëruar, të dëshpëruar dhe të tradhtuar.
Gjendja humanitare po përkeqësohet çdo ditë e më shumë. Familjet mbesin pa ushqim, ujë të pijshëm dhe ilaçe, ndërsa spitalet po shterojnë nga mungesa e energjisë elektrike dhe furnizimeve mjekësore. Për shumë njerëz, çdo ditë është një luftë për mbijetesë.
Në këtë situatë të pashpresë, protesta spontane po shpërthejnë në të gjithë Rripin e Gazës, raportojnë mediat e huaja. Nga kampet e refugjatëve te rrugët kryesore të qyteteve, qindra njerëz po guxojnë të ngrenë zërin e tyre, duke shprehur zemërimin dhe zhgënjimin e thellë.
Dhe për herë të parë pas shumë kohësh, zemërimi nuk drejtohet vetëm ndaj Izraelit – por edhe ndaj Hamasit. Banorët po kërkojnë përgjegjësi nga udhëheqësit e tyre, të cilët akuzohen për dështimin në mbrojtjen dhe përkujdesjen ndaj popullsisë.
Sloganet e protestuesve dëgjohen fuqishëm “Po për paqe, Jo për Hamasin!”.
Ata i fajësojnë të dyja palët për ferrin në të cilin po jetojnë, duke kërkuar një zgjidhje të menjëhershme për t’i dhënë fund konfliktit dhe për të sjellë ndihma humanitare, transmeton Telegrafi.com
Ndërsa Gaza përjeton shkatërrim të pandalshëm nga bombardimet, tani përballet edhe me një krizë të brendshme. Për shumë njerëz, ndjenja e tradhtisë dhe braktisjes është më e rëndë se frika nga lufta.
Por, reagimi i Hamasit ka qenë i ashpër. Forcat e tyre janë përplasur me protestuesit, duke kryer arrestime gjersa përdorën forcën për të shpërndarë turmat. Dëshmitarët raportojnë për rrahje dhe përpjekje për të heshtur zërat e kundërshtimit.
