Njësiti i Krimeve Ekonomike i Policisë së Kosovës ka realizuar një aksion tek Ministria e Bujqësisë, Pylltarisë dhe Zhvillimit Rural.
Lajmin e ka konfirmuar zëdhënësja e Prokurorisë Speciale Liridona Kozmaqi.
Ajo ka thënë se ky aksion është zhvilluar në lidhje me renovimin e objektit që shfrytëzonte AAK-ja dhe është tani nën menaxhimin e MBPZHR-së.
Ju informoj se Prokuroria Speciale e Republikës së Kosovës në mbështetje të nenit 83 par. 1 të Kodit nr. 08/L-032 të Procedurës Penale të Republikës së Kosovës, me qëllim të verifikimit të pretendimeve apo dyshimeve të ngritura në opinionin publik për veprimet e disa zyrtarëve publik të Ministrisë së Bujqësisë, Pylltarisë dhe Zhvillimit Rural, lidhur me renovimin e objektit që e shfrytëzonte AAK-ja, tani nën menaxhimin e Ministrisë, ka autorizuar Policinë e Kosovës, respektivisht Drejtorinë e Hetimit të Krimeve Ekonomike dhe Korrupsionit (DHKEK) në Prishtinë, që të kryejë veprime hetimore në mbledhjen dhe sigurimin e provave për sqarimin e rrethanave të çështjes” , ka thënë Kozmaqi.
Ajo ka thënë se disa zyrtarë publik të kësaj ministrie dyshohen se kanë kryer disa vepra penale.
Zyrtarët publik të Ministrisë së Bujqësisë, Pylltarisë dhe Zhvillimit Rural, dyshohen se me veprimet e tyre kanë kryer veprat penale: “ Keqpërdorim i pozitës zyrtare”, nga neni 414, të KPRK-së; “Keqpërdorimi dhe mashtrimi në prokurim publik”, nga neni 415, të KPRK-së dhe “Falsifikimi i dokumenteve”, nga neni 390, të KPRK-së” – ka thënë Kozmaqi, raporton Lajmi.net
Lajmi.net ka qëndruar pranë objektit të Ministrisë së Bujqësisë, ku ka parë se zyrtarët policorë kanë mbledhur një “mal” me dokumente, saktësisht kuti të mbushura plot e përplot me dosje nga kjo ministri.
