Presidenti letonez, Edgars Rinkevics pas takimit me Vjosa Osmani është shprehur se për dy arsye është e rëndësishme që ai ëshë në Kosovë.
Sipas tij, arsyeja e parë është diskutimi bilateral për mënyrën se si mund t’i avancojmë marrëdhëniet mes dy vendeve dhe e dyta, siç tha ai, kontigjentin ushtarak që shërben si pjesë e KFOR-it.
“Është shumë e rëndësishme që të jem këtu sot në Kosovë, për dy arsye. Arsyeja e parë është diskutimi bilateral për mënyrën se si mund t’i avancojmë marrëdhëniet tona mes Letonisë dhe Kosovës dhe diskutimit që e patëm për stabilitetin rajonal dhe për të diskutuar mbështetjen që mund të ofrojë Bashkimi Evropian për Republikën e Kosovës. Arsyeja e dytë është poashtu që këtu në Kosovë kemi kontigjentin më madh ushtarak që shërben si pjesë e KFOR-it dhe do t’i vizitojë trupat më vonë, pas takimit tonë dhe pas kësaj konference”.
“Më lejoni të them që në Letoni jemi shumë të interesuar që t’i përforcojmë marrëdhëniet tona politike dhe të zhvillimit ekonomik, mendoj se ende kemi shumë mundësi për t’i përmirësuar marrëdhëniet tregtare, por poashtu besoj që sektorët si farmaceutika dhe teknologjia e informacionit do të jenë me interes të përbashkët”, u shpreh ai.
Rinkevics tha se në takim folën për anëtarësimin e Kosovës në Këshillin e Evropës dhe se Letonia e mbështet plotësisht integrimin e vendit tonë në organizatat ndërkombëtare.
“Letonia e mbështet plotësisht integrimin e Kosovës në organizatat ndërkombëtare dhe diskutuam anëtarësimin në Këshillin e Evropës, e keni mbështetjen tonë të plotë, gjithmonë ju kemi mbështetur për anëtarësimin tuaj të plotë aty dhe besojmë që ky anëtarësim mund ta hap rrugën edhe për organizatat e tjera ndërkombëtare. E përsëris mbështetjen e plotë të Letonisë për procesin e integrimit evropian të Kosovës”, ka thënë ai.
