Përzgjedhësi i Kombëtares së Kosovës në futboll, Franco Foda, ka thënë se dy ndeshjet “Play-off” të Ligës së Kombeve më 20 dhe 23 mars kundër Islandës, duhen fituar më patjetër për të kaluar në Ligën B, andaj ka thënë se “duhet të tregojmë në fushë shpirtin luftarak”.
Në konferencën për media në prag të ndeshjes me Islandën, Foda ka folur edhe për gjendjen fizike të Valon Berishës dhe Amir Rrahmanit. Për këta të fundit, Foda u shpreh se janë në fazën e rikuperimit, teksa pret që t’i ketë gjithë lojtarët në dispozicion.
“Atmosfera është e mirë. Valon Berisha dhe Amir Rrahmani janë në fazën e rikuperimit dhe uroj t’i kemi të gjithë lojtarët në dispozicion. Islanda është kundërshtare që luan lojë taktike, por ne duhet të luajmë ndaj Islandës të përqendruar nga fillimi. E dimë se Islanda ka edhe lojtarë të mirë individual. Ne duhet t’i zbatojmë detyrat tona. Ne kemi dy ndeshje për t’i fituar. Të dyja janë të rëndësishme dhe duhet të fitojmë për të kaluar në Ligën B. Duhet të tregojmë në fushë shpirtin luftarak”, ka thënë Foda, teksa ka folur edhe për kundërshtarët e Ligës B.
“Është e rëndësishme të ngitemi në Ligën B. Ka dallim Liga B dhe Liga C. Ka kundërshtar më të fortë dhe duhet të ngrihemi për t’u përballur me kundërshtarë të tillë”, raporton Ekonomia Online.
Tutje, përzgjedhësi gjerman ka treguar se si do t’i qasen ndeshjes ndaj Islandës“Në ndeshjet e kaluara kemi treguar rritje dhe këtë e kemi treguar ndaj Rumanisë. Kemi treguar se mund të jemi dominues. Duhet të luajmë lojë intensive nga minuta e parë në ndeshjen ndaj Islandës”, u shpreh ai
