Vedat Muriqi ia dha fitoren Mallorcas në xhiron e 28-të ndaj Espanyolit me golin e sekondave të fundit.
Fillimi ishte jo i mirë për “Piratin”, pasi në minutën e 53-të shënoi autogol, duke ia dhënë epërsinë Espanyolit.
Situata për prizernasin u bë edhe më e vështirë kur ia huqi penalltisë në minutën e 62-të të takimit, ku humbi mundësinë që të “lahej” nga gabimi i 10 minutave më parë.
Topin në duar e mori Muriqi edhe një herë në minutën e 73-të, pasi gjyqtari fillimisht akordoi penalltinë e dytë, por në këtë rast ndërhyri VAR-i duke e anuluar 11-metërshin.
E kur u mendua se Vedat Muriqi do të shndërrohej në figurën më të keqe në duelin ndaj Espanyolit, “Pirati” shfaqet përsëri te pika e bardhë, për të realizuar gol në sekondat e fundit, duke i dhënë fitoren Mallorcas, në përballjen e sotme kampionale.
Me këtë fitore, Mallorca pozicionohet në vendin e 7 me 40 pikë, një më pak se Betisi që është në pozitën e gjashtë, pozitë kjo që i jep mundësi për gara evropiane, kurse Espanyoli gjendet në vendin e 15-të me 28 pikë.
