Në Ditën e Gruas është mbajtur marshi tradicional i grave në Prishtinë, raporton Ekonomia Online.
Marshi të cilin e organizojnë Kolektivi “Marshojmë s’festojmë” ka filluar nga sheshi “Zahir Pajaziti” për të vazhduar deri tek Sheshi “Skënderbeu”.
Motoja e këtij marshit edhe këtë vit është “Marshojmë për njëra-tjetrën”, në mbrojtje të të drejtave të grave.
‘Drejtësia me vonesë është padrejtësi’, ‘Sot marshojmë çdo ditë luftojmë’, ‘Trupi jem e drejta jem’ janë disa prej pankartave që kanë mbajtur në duar pjesëmarrëset e këtij marshi.
Me thirrjen drejtësi për gratë dhe vajzat si dhe poshtë policia patriarkale janë lexuar emrat e grave tashmë të vrara nga bashkëshortët e tyre tek objekti kryesor i Policisë së Kosovës. Me këtë rast protestueset e këtij marshi hodhën ngjyrë të kuqe drejt këtij objekti, duke kërkuar drejtësi për gratë e vrara.
Njëjtë vazhduan edhe në drejtim të objektit Këshillit Gjyqësor të Kosovës.
Në këtë protestë u bë thirrje që të marshohet kundër varfërisë së grave dhe për drejtësi.
Po ashtu u theksua edhe rasti i grave greviste –punëtoreve teknike të Kuvendit të Kosovës, të cilat protestuan për 79 ditë duke kërkuar pagë e kushte të dinjitetshme.
“Ato nuk do të merrnin pagë që u mundëson mbijetesën. Duke ua mohuar punën dhe të drejtën jetike për punë, gratë grevistë edhe pse e dinin që munden me humb e zgjodhën dinjitetin…Megjithatë grevistet na mësuan se çka është thjeshtë kurajë se shteti nuk na mbron”, u tha nga organizatoret e këtij marshi .
Po ashtu u theksua se përballë interesave të korporatave dinjiteti i punëtoreve nuk është prioritet.
“Transformimi nuk buron nga reforma, por nga solidariteti me njëra tjetrën kundër shtypjes”, u tha gjatë këtij marshi ku u potencua se në Kosovë ka dhunë seksuale, ekonomike, emocionale…, ndaj grave, raporton ekonomia Online.
Po ashtu u përmend edhe përdhunimin i shumëfishtë i 11 vjeçares në Kosovë. Për këtë u akuzua sistemi që dështoi ta mbrojë atë.
