Kapiteni i Kombëtares së Kosovës U-21, Etnik Brruti ka lënë fanellën e Dardanëve dhe nga tani e tutje thuhet se do t’i mbrojë ngjyrat e Kombëtares së Shqipërisë.
Lojtarë të ndryshëm, të lindur e rritur në Kosovë, por edhe nga diaspora, vazhdojnë të heqin dorë nga fanella dardane, edhe përkundër shumë ndeshjeve në ekipet e moshave.
I fundit që ka bërë një gjë të tillë është mesfushori i Malishevës, Etnik Brruti, i cili përveçse ishte titullar i rregullt në ekipet e moshave, ai së fundmi ishte edhe kapiten i ekipit U-21.
Lajmi për ndryshimin e kombëtares e ka konfirmuar edhe trajneri i Kosovës U-21, Afrim Tovërlani, i cili ka zbuluar edhe arsyet e këtij vendimi.
“Po, Etniku na ka treguar se po e zgjedh Shqipërinë. Arsyeja është për shkak të pasaportës shqiptare, përmes së cilës mund te transferohet më lehtë në Rusi”, ka thënë fillimisht Tovërlani për Telegrafin.
“Lojtarët tanë po mashtrohen nga disa kuazi-menaxhera, që po i joshin dhe po i mashtrojnë ata”.
“Nuk kam koment për lojtarët që po e tradhtojnë fanellën Dardane dhe që po luajnë me punën, mundin dhe djersën tonë”.
“Këtu kanë faj edhe Duka [Armand] dhe FSHF që nuk po e ndalin këtë trend. Ne nuk kemi forcë e fuqi që të punojmë për dy ekipe kombëtare”, përfundoi trajneri i Kosovës U-21.
Ndryshe, në të kaluarën një gjë të tillë sikurse Brruti e kanë bërë edhe Ardian Ismajli, Mirlind Daku, Arbnor Muja, Ermir Rashica dhe të tjerë.
