Keni programuar udhëtim në Milano në Mars? Epo në këtë artikull do ju bëjmë një guidë se çfarë të bëni kur të shkoni atje.
Marsi është muaji i ndryshimit të kohës dhe pranverës dhe sigurisht me ndryshimin e stinëve aty mund të bëni shumë gjëra të reja.
Mund të shkoni në kinema, për të ndjekur eventin e yjeve të Oscarit më 3 mars, mund të shihni një ekspozitë të re të sapo inauguruar, etj. Me pak fjalë, midis ngjarjeve kulturore dhe jo-kulturore, ka vërtet mjaft gjëra për të bërë për t’u kënaqur në maksimum.
- Qyteti Muze
Do të jenë 7 ditë kushtuar muzeve në mars, nga data 2 deri më 8. Kjo do ju lejojë të zbuloni trashëgiminë e Milanos në shumë aspekte të saj. Tema e zgjedhur këtë vit për ngjarjen e shumëpritur të promovuar nga Bashkia e Milanos në bashkëpunim me Shoqatën MuseoCity ETS është “Rrugët e Artit”. Brenda hapësirave muzeale, ofrohet mundësia për të admiruar vepra të pabotuara apo vepra të paraqitura në një mënyrë të re në rubrikën tashmë tradicionale dhe shumë të dashur nga publiku, “Muzeu i Fshehtë”.
- Java e Modës në Milano
Java e Modës në Milano Vjeshtë- Dimër 2025-2026 këtë vit ka filluar nga 25 shkurti dhe do të vazhdojë deri më 3 mars. Në këtë event gjigant të modës do të ketë 56 sfilata fizike dhe 6 dixhitale. 69 prezantime dhe 23 evente. Përveç pranisë së markave historike, nga Gucci te Prada, Dolce & Gabbana dhe Versace, ka shumë marka të reja në kalendar, si Giuseppe Di Morabito, Marco Rambaldi dhe Francesco Murano, të mbështetur nga Trusti i modës Camera Moda.
- Photo Vogue Festival
Nga data 6 deri më 9 mars, do të zhvillohet edicioni i nëntë i Festivalit Photo Vogue në BASE Milano. Tema e këtij festivali do të jetë “Pema e Jetës: Një Letër Dashurie për Natyrën”, duke eksploruar kështu ndërlidhjen midis njerëzve, kafshëve dhe ekosistemeve.
Programi 4 ditor do të përmbajë 5 ekspozita të mëdha me imazhe të jashtëzakonshme, filma të shkurtër eksperimentalë dhe video, vitrina dixhitale dhe mbi 60 biseda me artistë, fotografë, fotoreporterë, videografë, redaktorë dhe aktivistë të jashtëzakonshëm nga e gjithë bota.
- “Pokémon Go City Safari”
Të shtunën më 29 dhe të dielën 30 mars , për herë të parë në Itali, Pokémon Go sjell përvojën ekskluzive të City Safari në Milano , duke ftuar trajnerë nga e gjithë Italia të marrin pjesë në festën e madhe të Pokemonit. Pjesëmarrësit, qofshin trajnerë me përvojë apo lojtarë fillestarë, do të kenë mundësinë të zbulojnë Pokémon të rinj për t’i shtuar koleksionit të tyre. Çmimi i biletës është 10 euro për çdo ditë loje.
- Labirinti Arnaldo Pomodoro
Fondacioni Arnaldo Pomodoro rihap Labirintin e tij për publikun, një nga veprat më ndjellëse të artistit, i cili mund të vizitohet sërish duke filluar nga 20 marsi. E vendosur në bodrumin e selisë së Maison FENDI, vepra i fton vizitorët të jetojnë një përvojë të jashtëzakonshme mes gjarpërinjve të një skulpture. Vizita në Labirint, që zgjat rreth 45 minuta, është një përvojë zhytëse që të lejon të eksplorosh jo vetëm imagjinatën dhe poetikën e Pomodoros, por edhe mënyrat konceptuale dhe konkrete sesi artisti krijon veprat e tij. Një vend ku hapësira, miti dhe arti shkrihen në një përvojë unike dhe të përjetshme, transmeton Living Shqip.
- Festivali i Spiritualitetit
Nga data 19 deri më 23 mars rikthehet edicioni i dytë i Soul, festivali i Spiritualitetit i promovuar nga Universiteti Katolik i Zemrës së Shenjtë dhe Kryepeshkopata e Milanos. Aty do të keni mundësi të shkëputeni nga bota e rrëmujshme e përditshmërisë dhe të gjeni paqe në brendinë tuaj ato pak minuta që do të merrni pjesë.
