Ish-deputeti i VV’së, Fatmir Humolli ka komentuar deklaratën e kryeministrit Kurtit për përgjimimin e fundit Kusari-Radojçiq, i cili u shpreh se është situatë e montuar.
Humolli për GazetaBlic tha se, kryeministri Kurti është duke e nënçmuar intelegjencën qytetare dhe sipas tij, ai me këtë mendim është nisur ta fitojë prapë mandatin.
“Po e nënçmon inteligjencën qytetare, kështu duke nënçmuar qytetarin beson se do të të fitojë prapë. Kështu gjatë mandatit i ka nënçmuar, duhet ta kuptojë se edhe opozita kur ishte në pushtet ka bërë diçka të tillë dhe për këtë sot është opozitë”, tha Humolli për GazetaBlic.
Kujtojmë se, kryeministri i Kosovës, Albin Kurti ka folur për përgjimet e reja që janë publikuar ku dëgjohet shefja e Grupit Parlamentar të LVV-së, Mimoza Kusari-Lila duke biseduar me kriminelin serb, Milan Radoiçiq, përgjegjësin kryesor të sulmit në Banjskë.
Kurti ka thënë se për këtë rast zëdhënësi i LVV-së, ka dhënë përgjigjen e saktë, derisa ka shtuar se qytetarët e dinë se pse Radoiçiqi tash po ikë e dikur ishte në kryeministri.
“Unë vetë nuk i kam dëgjuar, por qytetarët e dinë se kush ka bashkëpunuar me Radoiçiqin edhe e kanë shumë të qartë pse Radoiçiq ka ikur tash dhe dikur ishte në Kryeministri. Për këtë zëdhënësi i subjektit ku unë jam kryetar, pra i LVV-së, Arlind Manxhuka e ka dhënë përgjigjen e saktë”, tha Kurti.
