Selektori i Kombëtares së Kosovës në futboll, Franco Foda ka bërë publike listën e futbollistëve të ftuar për ndeshjen miqësore kundër Norvegjisë.
Në listën e tij, Foda ka përfshirë 23 futbollistë kurse ajo që bie në sy është mungesa e sulmuesit të krahut, Milot Rashica. Rashica, së fundmi e ka fituar Kupën e Turqisë me skuadrën e Beshiktashit.
Lista e këtij grumbullimi dallon prej listës së muajit mars kur Foda mbajti grumbullimin e parë me “Dardanët”.
Këtë herë, Foda ka ftuar edhe lojtarë të rinj, siç është portieri i Tiranës, Mustafë Abdullahu dhe mesfushori i Lokomotivës së Zagrebit, Art Smakaj.
Po ashtu, Foda ka ftuar edhe 5 futbollistë nga Superliga e Kosovës. Bëhet fjalë për lojtarët e Ballkanit, mbrojtësin Lumbardh Dellova e Lindon Emërllahu, pastaj qendër sulmuesin Muhamet Hyseni e mbrojtësin Ilir Krasniqi të Llapit, si dhe sulmuesin e krahut Drilon Hazrollaj të Malishevës.
Lojtarët tjerë në listën e selektorit Foda, janë ata të zakonshmit si kapiteni Amir Rrahmani pastaj Vedat Muriqi, Edon Zhegrova, Mërgim Vojvoda e të tjerët.
Kosova në muajin qershor do ta ketë vetëm një miqësore, ku më datën 5 do të përballet me Norvegjinë në Oslo, përcjell Tëvë1.
Për Fodan, kjo do të jetë miqësorja e tretë në krye të Kosovës pas asaj me Armeninë dhe Hungarinë derisa po e përgatit ekipin për edicionin e ri të Ligës së Kombëve që nis në muajin shtator.
