Selektori i Kosovës, Franco Foda është prezantuar sot përpara mediave në konferencë për shtyp para lojës miqësore të “Dardanëve” me Norvegjinë, e cila do të luhet më 5 qershor.
Trajneri gjerman tha se ekipin e ka të kompletuar, përpos Arijanet Muriçit, i cili është i sëmurë.
Foda pret nga lojtarët që ta tregojnë veten në testin e fundit para fillimit të Ligës së Kombeve.
Ai pret që Kosova të bëjë paraqitje të mirë në Oslo dhe të shënojë fitore ndaj Norvegjisë vendëse.
“Do të doja t’i kishim 2 ndeshje, por për arsye të ndryshme nuk ka qenë e mundur. Gëzohem shumë që do ta kemi mundësinë të luajmë kundër Norvegjisë pasi është një përgatitje e mirë për nisjen e Ligës së Kombeve kundër Rumanisë”, deklaroi fillimisht Foda.
“Gati të gjithë lojtarët kanë arritur këtu përpos Arijanet Muriçit, i cili është i sëmurë. Unë me të jam në kontakt të vazhdueshëm dhe në këto 2 ditë do ta di nëse do të jetë i pranishëm. Për fat të keq i kemi disa mungesa për arsye të lëndimeve”, vazhdoi ai.
“E kemi një ekip mjaft të balancuar, mjaft të mirë, dhe jemi maksimalisht të përgatitur dhe duam të fitojmë”, nënvizoi Foda, përcjell Gazeta Express.
“Do të bazohemi në formën e lojtarëve, në profilin e tyre. Kjo do të jetë mundësia e fundit para lojërave të Ligës së Kombeve, që t’i testojmë dhe ta kemi një përshtypje dhe një pasqyrë për ta para atyre ndeshjeve”, përfundoi Foda.
