Ministrja e Punëve të Jashtme të Kosovës, Donika Gërvalla ka thënë se veprimet destabiluzuese të Serbisë janë të rrezikshme për stabilitetin në Ballkanin Perëndimor, përcjell InLajmi.
Ajo këto deklarata i ka thënë gjatë takimin me ministren e Punëve të Jashtme të Kanadasë, Mélanie Joly.
Sipas komunikatës së MPJD-së, në këtë takim Gërvalla ka falënderuar homologen kanadeze për mbështejen që shteti i saj ka dhënë për Kosovën.
Ministrja Gërvalla e njoftoi homologen e saj rreth situatës politike dhe të sigurisë në Kosovë duke theksuar veprimet destabilizuese të Serbisë, e cila sot përbën një rrezik për stabilitetin në Ballkanin Perëndimor dhe në Evropën Juglindore, thuhet në komunikatë.
Ministret Gërvalla dhe Joly diskutuan rreth fuqizimit të partneritetit në ngritjen e kapaciteteve të mbrojtjes së Kosovës, zhvillimit të qëndrueshëm, investimeve strategjike dhe bashkëpunimit në sektorin publiko-privat.
Në fund të takimit, Ministrja Gërvalla i dhuroi Ministres Joly pullën postare që simbolizon 15-vjetorin e krijimit të marrëdhënieve diplomatike mes 2 shteteve dhe mirënjohjen për mbështetjen e Kanadasë për Kosovën.
Gërvalla po qëndron në Kanada në shënimin e 25-vjetorit të pranimit të refugjatëve nga Kosova dhe 15-vjetorit të krijimit të marrëdhënieve diplomatike mes 2 shteteve./InLajmi/
