Mesfushori Besar Musolli do të jetë pjesë e Llapit edhe për edicionin e ardhshëm. Klubi nga Podujeva ka bërë të ditur të dielën se ka vazhduar bashkëpunimin me Musollin.
Me vazhdimin e kontratës, Musolli do të jetë pjesë e Llapit deri në fund të edicionit 2024/25.
35-vjeçari iu bashkua Llapit në verën e vitit 2023, ndërsa këtë edicion ka regjistruar 29 paraqitje në të gjitha garat. Musolli ka thënë se është i lumtur që do të jetë te Llapi edhe edicionin tjetër, ndërsa ka premtuar se në sezonin tjetër do të angazhohet edhe më shumë për ta ndihmuar ekipin si në kualifikimet e Ligës së Evropës ashtu edhe në Superligë.
Po ashtu, Llapi ka thënë se po punon intensivisht në rinovimin e kontratave me futbollistët aktuale dhe në përforcime cilësore, të cilat shumë shpejt do të bëhen zyrtare. Llapi këtë edicion e mbylli në pozitën e dytë në tabelë, ndërsa në Ligën e Evropës do të garoj prej raundit të dytë kualifikues.
