Trajneri i Paris St Germain, Luis Enrique, ka thënë se ndihet krenar që pjesë të skuadrës së tij ka qenë edhe ylli francez, Kylian Mbappe.
Të premten Mbappe ka bërë të ditur vendimin e tij për të braktisur PSG në fund të këtij sezonit. Në një postim në rrjetet sociale, ai ka shprehur emocionet e tij në lidhje me këtë vendim dhe ka falënderuar klubin dhe tifozët për mbështetjen.
Trajneri spanjoll ka thënë se e pranon vendimin e Mbappe për të ndryshuar skuadrën pas shtatë vitesh të qëndrimit në PSG.
“Ai i ka dhënë gjithçka këtij klubi, dhe ky klub i ka dhënë atij gjithçka gjithashtu. I uroj atij çdo të mirë për të ardhmen”, ka thënë Enrique, transmeton rtk.
Edhe pse nuk ka zbuluar destinacionin e tij të ardhshëm, Mbappe ka konfirmuar se do të largohet nga Franca. Kjo ka shkaktuar spekulime të mëtejshme në media, veçanërisht rreth një mundësie për t’i bashkuar Real Madridit, një opsion që është përmendur për një kohë të gjatë.
